《我老婆唔係我女朋友》【那些年／學界比賽／真人】 第四章至六章: 【第六章】 前 世 今 生（２）
「嘻嘻，Lulu陪我嘛，佢成個Sarah Connor噉款，無男仔敢行近。」《T2: Judgment Day》剛在西台的「週末930」首播，所以連村姑都對這電影中的角色有點認識，確實Lulu唔搞笑時係有啲台型的。
我心內的愧疚感有增無減，然而她繼續夢囈般自言自語，彷彿想趁機自白。「由你告白嗰日開始，我一直搵唔到你，心裡面就好似少咗一塊，每日都盡力平凡過日子，但悲傷卻不自覺喺失望中累積，我唯有喺教會以分享人哋故事嘅方式講出嚟，希望心裡面舒服啲。但我個心始終留咗喺嗰日個泳池旁邊，繼續等、繼續搵。我唔想淨係得嗰一日甜，我想每一日都甜呀。」
若非深情在，悲傷從何來。時間，從來都不是解藥！
「妳話妳去泳池撞我，噉妳去邊個池先得㗎？」我奇怪我留在泳池的腳毛，應該多過學校，何解會撞唔到呢。而且我又無女人緣，咁難得有囡「撞」我，仲唔𦧲飯應？！
「九龍公園囉，你話你隔日就去嘛。」阿心理所當然的答道。
我倒抽一口大氣。「唉～大姐，妳係唔係聽漏咗一個字呀，我練水個場係九龍『仔』公園，係『九仔』喎。嗰陣帶妳去九龍城玩咁熟路，咪因為以前日日途經去九仔練水囉。」
「吓！？」阿心嚇得忘了再垂頭，瞪大眼睛看我，眼核都快跌出來了。「唔怪得成個暑假都撞唔到你一次，唉～嗰個暑假我同Lulu曬到變賓妹呀，後來佢見我成日拉佢去，都覺得唔妥，仲猛問我乜事。」
難怪之前問她是不是有學過游水，她的神情有點古怪了。