《我老婆唔係我女朋友》【那些年／學界比賽／真人】 第四章至六章: 【第六章】 前 世 今 生（３）
我立時回憶起當天，她𦧲我陪她去舞會時的奇怪觀點：呢啲嘢自己一手一腳努力去搵嘅先啱心水嘛，垂手可得嘅點會有價值㗎。原來她所謂的「搵」，其實是苦苦尋找當年的我。
「癡線妹，好彩有緣，最後我都搵返妳啦。」面對這震撼真相，我只能用緣份來解釋了。
她點點頭又再輕輕的說。「我成日喺心入面祈禱，希望真係可以遇返你。最初見你只係覺得呢個人有啲親切，可能以前見過啩，性格態度又同『嗰個人』唔一樣，更加完全唔聽到你提游水嘅嘢，我都十五十六…後尾肯定真係你，又怕你唔記得我，好彩有張相影到你個無良心咋。」她愈講愈開朗，看來鬱在心內好長時間唔敢講了。
「噉你直接問我嘛，使乜估估吓啫。」
「當面問你我又怕，怕你真係唔係『嗰個人』嘛，噉點算呀，嗰陣你又好愛錫我，唔通我又唔要你，再等一個唔知喺邊嘅人咩，所以嗰陣我好矛盾。」她愈講愈神化，原來溝囡唔止要對付狗公毒檸，連昨天的自己都算是一個對手，好彩如果計嗰場暗戰，輸贏都是同一個「仁」贏得芳「心」…
她對我嫣然一笑，繼續說：「唔緊要啦，好感恩原來你哋真係同一個人，其實我已經好滿足嘞。當我知道你又要再比賽，又無信心，我就好想幫你囉。我自己又唔識運動啲嘢，聽米叔講一個運動員出去比賽，其實背後有一班人支援佢嘅，噉我咪畀心機做你背後嘅女人囉。」