《我老婆唔係我女朋友》【那些年／學界比賽／真人】 第四章至六章: 【第六章】 前 世 今 生（１）
前 世 今 生
突然她掙開我摟著她的手，再伸手和我十指緊扣。
「你記唔記得嗰晚喺地鐵我噉樣拖你呀？」阿心煞有介事的問我。
我點頭表示記得，那晚她心神恍惚，去蘭桂坊又走散了，我們也在那晚正式開始的。
「其實嗰晚喺舞會我已經肯定，你就係中學時泳池邊嘅『嗰個人』喇，因為好幾次你講嘢啲語氣都同以前一樣。」她垂下頭好像下了決心，輕聲的繼續說：「我同你講啲嘢，但你應承我唔准嬲，又唔准攞嚟笑返我。」
「妳唔嬲我，我都還神啦。老佛爺。」我啞然失笑，無咗阿心，我都唔知自己仲摺埋邊處。
「應承我？」
「係喇，我應承。」
「嗯～其實你嗰陣真係叫過我做你女朋友㗎，不過我睇你個樣就知你唔記得咗，咪一直唔提囉。我覺得你以前好叻㗎，又代表學校又攞獎。不過你送完個金牌畀我後，我又無你電話，想搵你都搵唔返，所以我問返學校，知道你讀邊間中學，但佢哋又無你個名，唯有去你中學門口撞你囉，後來放暑假就成日去泳池游水睇吓會唔會見到你。」阿心娓娓道出一番令我驚心動魄的話。
我聽完後幾乎暈低，那想到她這麼癡情，不負責任的戲言差啲害咗個無知女友。
「我中學一係就走堂，一係就一放學即走去九龍城，再泳池有落，妳點會等到我㗎…哎吔，妳自己一個去男校門口湊放學咁大膽？」我當然唔敢提，我之前根本認不出眼前的她是當天的她。