《我老婆唔係我女朋友》【那些年／學界比賽／真人】 第四章至六章: 【第六章】 超乎想像的付出（３）
好一會後，我感覺她在撫摸我頭臉，用手指梳理我的頭髮，然後湊近在我耳邊輕聲的說：「我驚你做咗對我唔住嘅嘢，我又驚你無端端話要分手呀。」
我張開眼睛想看看她，那知她剛才摸我頭時將小毛巾蓋在我眼上。
「唔准你望我呀。」她緊張的下禁令。
「唉呀～我驚妳唔要我就真啦，妳諗下，我樣樣嘢都要妳照顧，係妳咁懵盛盛吼我啫，老佛爺唔好玩我啦。」頓了一頓突然省起：「呀！有一樣嘢唔好再做，唔係真係分手無得傾。」
「好學唔學，學埋Leon啲衰嘢。講啦～乜嘢呀。」她是指我叫她做老佛爺，不過可以聽得出，她的聲音已較為寬心。
「唔准再整『天殘腳』呀。嗱，再整分手！」
「吓，乜嘢係『天殘腳』呀，講清楚啲好喎，無謂有誤會啦，你睇吓係咪噉？」我察覺有異，再張開眼時，又發現腳板底又已經𢲲在我面前。
頂你又嚟？！
我坐直身體（又出「天殘腳」想繼續瞓都唔得啦），伸手摟著她肩膀。「妳唔好多心啦，我都話過我轉數唔夠妳快，所以講嘢唔清唔楚囉。人人都係緊張自己，唯有妳總係擔心我，自己又唔顧吓自己，妳睇妳隻手？搽冬青膏搽到敏感又唔出聲！」
「咩呀，少少之嘛，都話兩三日就退㗎啦。」她仍是滿不在乎的說。
「噉妳係女仔嘛，我想妳做我公主，唔好做妹仔啦。其實我都想自己有用啲，可以襯得起妳嘛。」我肉緊的回應。