《我老婆唔係我女朋友》【那些年／學界比賽／真人】 第四章至六章: 【第六章】 超乎想像的付出（２）
「我對妳唔住囉…」我仍是不知道可以怎樣表達。
她似乎更加緊張而且忟憎：「你講乜嘢呀？講清楚啦！」
「唉～我想話人哋拍拖都係去行街睇戲，但我成日要妳嚟公園做骨妹，好似好委屈噉呀。」這是我想到最好的說法了。
我見她眼圈好像紅了起來，正想問她怎麼了，那知她快手又再扭我耳仔，今次真係用力扭。
「你嚇嚫我呀！你個癡線佬。」她大聲的說，而我由癡線仔升呢成癡線佬。
我只好苦著臉陪笑：「嘻…有啲痛…輕手啲啦。我想當妳公主噉湊，唔想妳成日做骨妹之嘛，係咪有啲誤會呀。」
「哼～」她別個頭去不看我，但我瞄到她好像用小毛巾印面。
「喂，妳做乜嘢呀？」輪到我有點緊張問她。
她又再用力扭我耳仔，咬牙的說：「無～～嘢～～呀～～你下次講嘢唔該講清楚啲呀。」
「哎呀～輕力啲啦，妳以為我想講咩嘢呀，咁激動做咩啫。」其實我擔心她多過耳朵痛，這隻老虎乸從來都是紙老虎，每次扭耳仔都只是裝模作樣，非常輕力的掂著扮拉扯而已，根本說不上痛，我大叫大嚷誇張一點，也是𠱁𠱁她，讓她消氣，所以也讓我愈來愈放肆，真正縱壞晒！
她看起來有點靦腆。「唔知呀～」
我輕輕捉著她的手，在她手背親一口，然後放回我臉上。「唔講就算啦，我真係覺得太委屈妳咋。」