《我老婆唔係我女朋友》【那些年／學界比賽／真人】 第四章至六章: 【第六章】 晨 操 收 爐（３）
「好呀，考完試就玩大啲吖，我就嚟比賽唔飲汽水嘞，起三飛啦，我夾pull board（腳浮板）齋用手讓你又點話。」起三飛即是三倍訓練量，我小時候俾老坑屈過，個半鐘的訓練時間根本是無可能游完三倍份量的。
近這大半個月每次被虐都是練手，大大的強化了上半身的力度，用pull board反而覺得輕鬆。
聽到我讓賽齋用手，細豬計落有著數，躍躍欲試：「挑！嚟咪嚟，怕你呀！」
我將秒錶交帶給鴻輝：「喂，等下幫我哋計時啦。」其實自己也想趁機測試一下比賽尾段加速的可能性，盤算在初賽時用中速留力。
「預備～開始！」鴻輝大叫。
在石製跳台一齊跳Start起步，到完成潛游升出水面划第一下手，佔先的居然是細豬！唔係身高就是贏家嗎？話雖如此，但我的大髀夾住pull board，跳Start時腿不能彎曲（大家自己用大髀內側夾住個小枕頭，試試彎腰跳動就知道有幾捩棄了），所以要就住來跳（頂到小弟弟超痛的），自然是比較慢了。
然而忍耐著，避免急進而自亂陣腳，採用肥直所教的「翻閹」泳法，到25公尺（半池）時已然趕上細豬，在毫無壓力下還可邊游邊自我評估，自忖划頻還一直維持中速而已，體力方面仍然遊刃有餘；過了半池後，逐漸增加划手的頻率（腳夾pull board，不能踢水），去到最後15公尺（池底有條瀝青幼黑線的）再閉氣全速衝線觸壁。
眼尾瞄到應該比細豬快差不多一個身位。
「老人渣29秒2，細豬33。」鴻輝大聲報數。
嗯～似乎狀態都幾好，中速只用手都可以做到29秒呢。