《我老婆唔係我女朋友》【那些年／學界比賽／真人】 第四章至六章: 【第六章】 再調教我女友（１）
再調教我女友
「搞𠶧，捽完喇，快啲著返衫唔好冷嚫。」升呢做骨妹的阿心，輕輕在背後打了我的膊頭一下。
這幾個月一有空，她都會在石硤尾公園幫我按摩肩膀。
「都成29度啦，點會冷嚫呀。」我咕噥著。
天氣開始熱，晚上氣溫都徘徊在28～29度左右。但她似乎忘記了我晚晚在泳池都赤膊開工，要凍嚫一早就凍咗。
她瞪了我一眼：「唔准駁嘴呀，按摩完容易攝嚫㗎嘛！又就嚟比賽嘞，要小心啲呀。」
「係～係～王教練～」我吃下最後一粒雞蛋仔，不情不願的穿回T-shirt。她下午買了雞蛋仔吃，留了三大粒給我頂肚。是呀，三粒咋…減肥嘛…我又再一次懷疑她是體貼還是刻薄了，哈。
阿心說：「喂呀，聽我講呀…」
「欸，橫豎今日無人，畀我瞓低先吖。」我截住她的說話。
平日老榕樹下都有叔伯大媽乘涼，今晚可能太熱，反而杳無人煙，讓我們霸了整張長椅。
「咁麻煩，快啦～」她嘟嘴喃喃自語，讓我頭枕在她大腿上睡，享受所謂的「膝枕」，也是我近來最期待的「殺必死」。幸好她體質偏寒，從不介意大熱天時也抱著個大暖爐在懷中。
吁～～好舒服～～按完摩身心舒泰，幾乎一瞓低就可以瞓著。
幫我按摩時，阿心都會帶備一條小毛巾，用來抹乾淨手上的冬青膏，她一邊用小毛巾抹手一邊說：「Lulu知你有練水，打嚟話佢遲啲校內水運會，想去你度練吓喎。」
看著那小毛巾在我面上揚來揚去（我頭枕在她大髀上），我心不在焉的答道：「哦，咪嚟囉，妳都知無問題㗎。」
她放下毛巾，低頭看我。「吖，你又嚟？！」
弊，又被她發現我心不在焉添。