《我老婆唔係我女朋友》【那些年／學界比賽／真人】 第四章至六章: 【第六章】 晨 操 收 爐（２）
後來阿里仔果然在U15國際賽中取得佳績（自費出外比賽，酒店機票食自己，我廿幾歲仔連飛機都未識坐啦），之後按著明日之星的劇本，逐步邁向奧運之路，好多年後他亦步上運動員商品化的套路，開展演藝事業，唱歌出CD、拍電視電影、溝靚女明星、發展自家品牌等通通都有份。在螢光幕上再見到他時，他已經改名不叫阿里仔了，我跟阿心說我認識這個明星呀，她只淡淡的揶揄，我夠識鄭Ｃ基啦，邊個唔識啫，佢唔識你嘛。吹脹！
五月最後一個星期是考試週，今次考試除了吞書、啃筆記和嘔答案外，期間晚上仍會返麗池開工和練習，要溫習時都是跟阿心屈蛇去【神都】摺埋拉把。
考試過後，大部份同學都在盤算讀暑期班（Summer Course），那些年大家都希望盡早儲足學分或拉高GPA，務求成功畢業，早點投身社會工作賺錢。我和阿心那A2班的同學，基本上全體都讀暑期班，不過暑期班要額外收學費，而且和半工讀生一起上課，所以一般對出席率比較著緊，不能隨便走堂，上課時間都偏重在周未和晚上為主。
正式踏入夏季後，六月初的一晚，返麗池開工時，細豬又叫陣打賭汽水。
「老人家，好耐無輸賭汽水囉喎，嚟番轉哩？」條肥滯就嚟變職業賭徒了。
我沒好氣的說：「你有錢咩？」
那知道細豬居然一拍心口：「啱啱考完試，老竇畀咗錢我去玩，你夠唔夠薑吖？」
咁勇？你想輸我唔畀你輸咩。