《我老婆唔係我女朋友》【那些年／學界比賽／真人】 第四章至六章: 【第六章】 PE仔的絕世荀工（４）
「喂，點解報個噉嘅時間上去㗎？而家即係排名全場最慢喎。」我見到這個數字大感愕然，普遍50自如果慢過29秒，會被認為連入決賽也沒資格。
Leon忙不迭解釋：「哎呀，你唔記得我搵你報名嗰日係截止日咩，我又唔清楚你想報乜嘢時間，咪隨便填個時間囉。」
我再看看第二組初賽，陳嘉樂28秒排3線，哼！舊相好排個好位喎，心中不是味兒。
阿心靠過來關心的問：「排位會唔會有好大影響㗎？」
「如果比短途其實無所謂嘅，反正一落水都係全程放盡。但如果比中長途，某啲泳池拉泳線時扯唔緊，係會有水流上嘅影響㗎，食住人哋啲水流游會慳力啲囉。」我簡單跟她解釋一下排位優勢。再指著Leon跟她說：「往績唔夠人快無得好講，如果我報200或者400排條噉嘅線，我實摙死佢呀。」
我的另一項學界冠軍是游200米的。
「哈哈，佢實係唔夠瞓發脾四。老佛爺，小人告退先嘞。」Leon先跟阿心說聲，再一拍我膊頭，逕自趕去開會。
看看時間原來已經夠鐘上堂，叫阿心自己先返上去上堂，我自己就食埋佢買畀我碗齋米先慢慢踱返去。