《我老婆唔係我女朋友》【那些年／學界比賽／真人】 第四章至六章: 【第六章】 PE仔的絕世荀工（３）
Leon又搭嘴：「哎呀，妳有無睇《叮噹》吖（Sorry，始終接受唔到叫《多啦A夢》），靜宜身邊成日有個狗公高材生叫彬仔（出木杉），條友exactly就係噉樣。」
我跟手補槍：「佢身邊成日好多囡圍住㗎，我每次同佢一齊喺起點，等比賽開始時都同佢講，『喂，啲女你都溝晒啦，游慢啲好喎』。」
Leon爆笑：「你真係噉同佢講呀？佢點答呀？」
我沒好氣的答：「條粉皮咪淨係笑笑口噉囉，同阿扁一樣咁好脾氣，吹佢唔脹。」
Leon跟阿心說：「妳個小仁子以前中學嗰陣啲性格、脾氣，同而家完全係兩個人嚟㗎。」
阿心也在笑：「我知道呀。」
Leon愣然：「妳又知？乜妳中學時已經識佢喇咩？」
她微笑著斜眼望我：「唔知呢～」
嗱～我都話阿心蠱蠱惑惑，學生妹時已經暗戀我㗎啦。
我拿起那份排位，翻到50自初賽那頁，嗯～初賽有兩組，睇吓我個名…初賽第一組第8線，名後面寫著呈報的最佳時間為35秒。初賽游第一組第8線，即是代表全場成績包尾，因為申報成績或往績好的，都會被編到初賽最後一組。簡單就排位來說，我是50自這場比賽裡，被排定為往績最差的參賽者。