《我老婆唔係我女朋友》【那些年／學界比賽／真人】 第四章至六章: 【第六章】 PE仔的絕世荀工（２）
「我其實同佢無乜私交，佢只係我比賽場上嘅『青梅竹馬』啫。妳記唔記得我講過我係『分齡賽最短命紀錄保持者』，咪就係佢喺第二場初賽即刻破返我紀錄囉，好彩我決賽贏佢咋。計起嚟佢係同我有一樣紀錄嘅人。」我回憶起當天的情況，實在猶有餘悸，前一刻還因破紀錄在狂喜，不到10分鐘居然聽到叫咪話紀錄又再次被破，簡直晴天霹靂，人生的大起大落，我細細個已經領教不少。
我頓了頓再說：「加上佢讀【孖你慢司祭】，又係同區中學，而且佢練嘅主項同我一樣，所以幾乎每次學界、區際、分齡，一到決賽，佢梗喺我隔離左右，我哋成日被人叫做『死唔斷氣』二人組，即是4／5線成日都見到我哋兩個，佢好似贏我多過我贏佢添呀！呢，Leon條友游蛙式主項，所以出嚫去比賽佢淨係食花生贈慶，唔關佢事。」最後我指著Leon說。
他不慌不忙的攤攤手向阿心說：「阿心輪到妳聽下佢呻嘞，我由細聽到大，都聽咗成六七年嚕。」
「哦～乜佢個人好差嘅咩？」她對總舵主饒有興趣的繼續問。
「噉又唔係嘅，佢都算溫文有禮，名校生又高大靚仔，係呀，高我成大半個頭呢，噉唔friend就唔friend㗎啦。」話晒都是「宿敵」，見嚫都係上賽場正面對決，可以有幾friend呢。