《我老婆唔係我女朋友》【那些年／學界比賽／真人】 第四章至六章: 【第六章】 PE仔的絕世荀工（１）
PE仔的絕世荀工
記得以前中學時，Leon和我兩個泳池常客，經常會見到男體育老師帶女學生上泳課或出外比賽，目擊他們其實只在池邊指指點點過日辰，無人考究他們是不是真的精於泳術，但重中之重的，就是他們可以有無盡的福利！眼睛食盡冰淇淋（嗱！我哋話眼看啫，無講話隨便起筷，請大家切勿亂諗嘢，作無謂FF，拉得㗎），所以我和Leon儘管都鄙視這個工種，卻極度羨慕（加妒忌）這份絕世荀工！
「吓？！佢都入到【私販】？邊科呀？」我驚訝識游水竟然真有出頭天，有相熟（以前）的人可以做到荀工，明明我媽話無前途、實乞食、等踎街喎。
「呿～升格咗叫【烤肉樂園】喇，你乜嘢年代㗎。聽阿扁講佢『PE仔』喎，根正苗紅到不得了，一畢業就做梗體育教師嚕，吹脹～」PE仔就是主修體育科的男生了。
「嘩頂～人生大贏家啦。」我由衷的讚嘆，根本【肉園】畢業＝止蝕＋紅盤高開——人工比之商科畢業生高一大截。
英殖年代，在學額不足的實況下，社會普遍仍重視教育，因此教師的社經地位也相對較高，絕對不似在某個時空由小鄉農主理，有如焚書坑儒般的慘烈。
阿心插嘴問Leon：「你哋好似同總舵主好熟噉嘅？」
「嘿，禀告老佛爺，妳個小仁子同佢熟啲，妳問吓佢啦。」Leon口甜舌滑，𠱁女確實有一手的。
逗得阿心開懷大笑，白了Leon滿有風情的一眼：「成日亂噏呀吓。噉你講啦。」
前一句是跟弄臣Leon說的，後一句則是吩咐小仁子我的。