《我老婆唔係我女朋友》【那些年／學界比賽／真人】 第四章至六章: 【第六章】 書劍恩仇舊相好（３）
我再打個呵欠後，好整以暇的跟Leon說：「喂頂你，講嘢小心啲啦。」向他呶呶嘴示意他望向阿心，對老友說話不用太客氣的。
他稍微一瞄已然會意，醒目的直接跟阿心解釋：「呵～老佛爺請息怒，妳老人家有所誤會嘞，阿小仁子嘅『舊相好』係麻甩仔嚟嘅。小人講得唔清唔楚，罪該萬死呀～～」逗得她噗嗤的笑了出來。
我對阿心伸脷扮個鬼臉，再問Leon：「邊個『舊相好』呀？阿扁呀？」
「唔係啦，阿扁呢期做幹事，唔會落場喇。估唔到呀？係總舵主呀。」Leon說出一個故人的暱稱。
「吓，總舵主？人名嚟㗎。」今次罕有地由阿心主動發問，顯然因為「舊相好」的緣故，她一直都非常留心我們的對話。
嘿，總舵主！竟然是他。久違地聽到這個名稱，心中不禁有點百感交集，畢竟退役都好幾年了。
「妳有無睇過金庸小說《書劍恩仇錄》呀？」輪到我向老佛爺解釋了。
她擰擰頭表示不知道。
「哦，噉講完收線嚕～講妳又唔知，帶妳又嫌遠。」我攤攤手。
那知她瞪眼催我：「快啲講呀！」
「嘻，咪心急，《書劍》裡面，紅花會揸旗嗰個就係總舵主陳家洛啦。咁啱嗰個舊相好又叫陳嘉樂，同名不同字啦，所以我哋自細都叫佢總舵主囉。」我別過頭問Leon：「總舵主仲健在呀？佢讀邊間呀？」我和總舵主真心不算是好朋友。
Leon有點酸溜溜的說：「喂，人哋考得唔差呀，有機會做到我哋以前最葡萄嘅頹工——女校阿sir。」