《我老婆唔係我女朋友》【那些年／學界比賽／真人】 第四章至六章: 【第五章】 義氣心再現江湖（２）
適時妹豬在池邊大聲「助攻」：「咋喳淨係識游蛙式咋喎。」果然女生外向，手指拗出唔拗入，抵讚！
「呵～肥滯游蛙式喎，你無問題㗎啦？」我明知細豬不擅長蛙式，一於連消帶打。
果然單細胞囁嚅著：「我…我游蛙式唔得喎。」
好，可以食住上了。我落地還錢：「喂你游自由式唔公平喎，再讓啦，斬多一半啦！」
「嘩，我同佢差好遠距離喎！」單細胞本能上抗議。
「係噉㗎啦，驚輸咪唔好比囉～」我用輕蔑的語氣火上加油。
「挑～我會輸？」單細胞大有豪情蓋天的氣勢。
哈哈，最怕你唔講呢句。我拉著阿心涉水行去距離終點約10公尺的位置，這個距離如果游蛙式的話，實際上只需要游4到5吓就到終點了，雖說自由式的速度最快，可是就算是奧運冠軍「匪夷所思菲比斯」上場，按照不平等的比賽距離，物理上是沒有可能追得及的（50公尺 vs 10公尺），更何況是單細胞的細豬。
我又乘機攬她纖腰，凝脂般的肌膚又軟又滑，過足手癮。「咪鼓埋泡腮啦，妳好叻喎，代夫出征，緊唔緊張呀。」
她笑著白我一眼，似乎對我的毛毛手不太介意。「飲支汽水啫，點會緊張呀，你又幫我安排好晒啲不平等條約喏。」
「嘻嘻，咁妳享受比賽喇，雖然我從來都唔享受嘅，我喺終點等妳。」萬般不情願的放開這件到口邊的「滑肉」。