《我老婆唔係我女朋友》【那些年／學界比賽／真人】 第四章至六章: 【第五章】 又來人生成就解鎖（４）
噢，差點忘了說，肥直真的幫我跟泳會（社區中心）𢯎到兼職職位和薪金，是助理教練，有成150大洋一粒鐘呢，一個月下來差不多有2700了，只比一份兼職私人補習略遜（比較起來時薪是低的，但勝在一星期返3晚兼長做長有），都夠我這個窮隱的日常開支了。
稍後開始入場時，因為肥直已經將日常營運雜務過底給我（千祈唔好妄想唔使做），我要負責跟泳池方面簽到、報人數、安排入場和在locker取出練水物品，為免冷落女友，要先安排一枝「盲公竹」帶住她，最佳人選莫過於模範細妹的妹豬了。
「喂妹豬，一陣幫我帶住姐姐，佢第一次嚟游水，話佢知邊度換衫，要帶佢出泳池呀。」我拉住準備入場的妹豬。
「哦…咦？咋喳（姐姐）妳係仁呱瓜女朋友呀？」妹豬向阿心問道，二話不說就開始摸底。
阿心甜笑著點頭，望向我說：「果然係名不虛傳咁醒噃。」
「我去做嘢先，妳跟住妹豬喇。」我叮囑她一聲，不放心又再吩咐妹豬一遍。「喂，妳唔好瀨低姐姐自己一個呀，去邊都帶住佢呀。」
妹豬居然行去拖住阿心：「收到喇，我會帶咋喳入場啦。」又啟動了老人精模式。
搞𠶧登記手續，守尾門肯定所有學生已經入場，我是最後一個入到更衣室換衫的人。