《我老婆唔係我女朋友》【那些年／學界比賽／真人】 第四章至六章: 【第五章】 又來人生成就解鎖（３）
「吓？！噉妳幾耐先洗一次頭㗎？」我瞪眼看著她。
她理所當然從容的答道：「3日啦，有時候有頭油又唔想洗，扎馬尾就最方便喏。」
「乜話？！原來妳扎馬尾係因為個頭污糟，懶洗頭？」簡直是旱天雷連攜晴天霹靂。
「係啊，唔係仲會有乜嘢原因呀。」她再次以理所當然來回應。
天啊，雖然我一早知佢麻甩，但原來我一直迷戀的馬尾頭，背後居然有不可告人的暗黑秘密…
吵吵鬧鬧中，我們手牽手去到麗池。哈，有囡陪著一齊去練水，達成了小時候的另一個心願，也可算是另類的成就解鎖了。
我拉著阿心先去找肥直打個招呼：「阿直，我帶個朋友嚟游水，今晚多一個人。」
條肥佬先笑咪咪向阿心打聲招呼，別轉頭面無表情的對我說：「你自己加人數咪得囉，副教練！」轉頭又對阿心和顏悅色的說：「隨便跟住啲細路游就得嘞。」
由於一眾泳會是佔用清場時間來做訓練，所以場內並無其他公眾人士，因此租泳線的條款並不限制各泳會的入場人數，只需在進場時報備即可，也是我們小時候被人昆來練水的弔詭之處——可以「隨時」帶朋友來游免費水，從而鼓勵他們加入游泳訓練的行列。
看見肥佬的搞笑，阿心覺得有點奇怪，我則見怪不怪，笑著對阿心說：「呢個肥佬成日亂嗡嘢，唔使理佢。唔該晒啊阿直。」最後一句是跟肥佬說的。