《我老婆唔係我女朋友》【那些年／學界比賽／真人】 第四章至六章: 【第五章】 調教我女友（１）
調教我女友
肥直行過來問我：「頭先唔記得問吓你個膊頭有無痛添？阿里仔有通知我，佢都有酸痛情況喎。」
我脫去T-shirt，露出拔火罐後，觸目驚心的紅印。「唉～你自己睇吓嘞，個膊痛到仆街呀。」
「嘩，唔使去拔罐吓嘛？上星期操第一課咋喎，應該好輕鬆㗎。」肥佬誇張的聲音，引起更衣室內其他人的注意，紛紛望向我的背脊。
於是我將這幾天的情況簡報給他聽，當然包括阿心今晚來監場的原因，最後我攤攤手：「你仲話乜嘢好輕鬆喎，而家兩臂舉起都會酸軟，我想今晚休息多一晚唔練住。」
肥直擰晒頭輕聲罵道：「嚡～而家啲後生真係屎！」
「嘻，阿直睇開啲啦，我廢青嚟咋，畀我唞多晚啦。」今晚有囡陪，我仲同你癲？
他從鼻孔「吁～」長長的呼出大氣，邊行邊說：「你自己決定啦，我理隱得你咁多，你今晚搞𠶧啲細路先好陪姿娘仔（潮汕話姑娘仔、後生女）呀，聽朝照舊5點【灣仔池】。」
我哋見晨操時偷雞（6點前正式租場時間）真係無人理，於是又再提早半小時，由5點開始私練，現在我有足足1小時私片時間。
我暗喜應道：「係～收到。」心下已在盤算，等吓怎樣快手快腳打發班細路。
這時候細豬聯同佢班童黨，在我背後演出「男子單打」。「老人家梗係風濕病發作喇，你睇佢周身爛肉，呵呵。」
另一個細路鴻輝也在撥火：「睇佢隻手好似廢咗，今晚撩佢輸賭汽水有著數呢。」眾人似乎蠢蠢欲動。
細豬終於開聲約戰：「喂老人家，今晚賭支汽水哩？」