《我老婆唔係我女朋友》【那些年／學界比賽／真人】 第四章至六章: 【第五章】 又來人生成就解鎖（２）
我繼續落嘴頭：「妳又唔放心我自己去喏，唯有妳陪我一齊去囉，妳去浸浸水玩吓囉，等妳知我平日做咩都好呀。」繼續嗲她！
「我…我好耐無游過水囉喎…又未執嘢，乜都未準備…好捩棄喎。」
「妳陪我去啦，妳唔去我一陣又整嚫㗎喇。」輪都輪到我出mind trick了。
「哎…唉呀…你激死我喇，去啦、去啦！」她真好呢，始終不放心我自己一個。
約好了大半小時後到她家樓下坐巴士。
阿心編了條鬆鬆的斜邊大辮子，一直編到肩膀以下，垂在左肩上，穿了條吊帶工人褲，四個骨長度，跟我一樣踢拖鞋，揹了個長布袋，十足去沙灘一樣。
「嘻嘻，呢個形象唔同晒喎。嗱，我唔叫妳去游水，咪見唔到個咁可愛嘅樣囉。」換過不是返學的「制服」，她有另一種鄰家女孩的感覺。
她沒好氣的白我一眼：「你都唔知女仔要整乾頭髮要幾麻煩？所以先唔想去游水嘛。」
「嘻嘻，噉妳陪我嘛，乜妳唔係日日洗頭嘅咩？點解會難呀。」現時每日「最少」洗頭3至5次的我，差不多每隔幾小時就來一次，洗頭幾乎是理所當然的事（亦多得這從小練水時養成的習慣，現在雖然毒，但起碼不是油頭毒隱）。
「邊個話女仔會日日洗頭㗎，短頭髮都還可以，長頭髮如果唔花時間吹乾會好蓬鬆，唔見得人㗎！」她以女性的角度來反駁。