《我老婆唔係我女朋友》【那些年/學界比賽/真人】 第四章至六章: 【第五章】 溝埋嚟玩跌打啦~笨(1)
溝埋嚟玩跌打啦~笨
原本靜靜地在聽Discman的阿心,見我們返出來,連忙放下耳筒緊張的問:「睇完嗱,點呀?」
「未呀,我叫師傅出嚟一齊講畀妳知呀。」我挨著她坐下來,粘著她個心都定一點。
「唏,不如你跟大妹叫我米叔啦,師傅、師傅sounds ancient。大妹聽緊乜嘢?放去CD機一齊relax吓。」米叔隨口吩咐阿心。
阿心應了一聲,熟門熟路的起身去搞CD機。
米叔又再說:「大妹以前日日過嚟搵我補習英文啦,有時候仲幫手看舗。」
「唔怪得佢啲英文好我咁多啦!原來有私人補習。」我由衷的讚道。確實她的英語能力都比我強多了。
「嘻嘻,米叔~我好似送貨過嚟多啲囉。」阿心笑著回應。
音樂播出,高辨識度的歌聲宛轉悠揚,又是王靖雯。
〈♬ 有一個人 曾讓我知道 寄生於世上 原是那麼好 ♫〉
〈♬ 他的一雙臂彎 令我沒苦惱 他使我自豪 ♫〉
這一首歌,只是頭幾句歌詞,就已經寫進我的心坎中,「有一個人」不就是我的寶貝女友麼?只是令我沒有苦惱的是「她」的臂彎而已,不期然呆望向她。
剛好她放完CD走回來,見我對著她傻笑,用眼瞟了瞟,抿著嘴低聲笑罵:「癡線仔。」
「首歌幾好聽喎,歌名叫咩嘢呢?」似乎又被她看穿心事,我趕快轉換話題。
「唔知喎,碟面乜都無,白碟嚟㗎。」阿心一臉疑惑說道。
我拍拍額頭,想起應該是Leon剛才借給我,讓我帶給阿心的白版碟。只好說:「我都唔知,唯有遲啲問返啦。」
![](https://i.imgur.com/JPYB06ml.jpg)