《我老婆唔係我女朋友》【那些年／學界比賽／真人】 第四章至六章: 【第五章】 溝埋嚟玩跌打啦～笨（２）
後來才知道，這張白板碟只有4首歌，打算在第三季推出，是王靖雯的首張迷你專輯《如風 Autumn Version》。不能不提這張EP的封面照片，是王靖雯罕有的清新田園風造型，而在這張碟之後，不論曲風和形像也開始走偏鋒了。
《如風》王靖雯
阿心坐回我身邊，指著我向米叔問道：「佢啲傷嚴重嘛？」
「Well～」米叔好整以暇的慢慢說。「佢應該拉傷咗肩膊同背脊肌肉。」
他轉而對著我說：「你背向我哋，再慢慢重做一次訓練動作，do it very slowly。」
我慢慢的舉直兩臂，雖然無可避免的牽扯到痛處，可是已有心理準備和做得緩慢，能夠勉強做下去。
「嗱，妳睇到嘛，就係呢度呢條筋位啦，呢塊肌肉啦，佢一拉動就扯到嘞。」原來他用我的身體來做活體模型指給阿心睇。
然後他繼續跟我說：「游水本來就係非對抗性運動，所以基本上係唔會傷到筋骨嘅，但高強度訓練之後，pain is inevitable，通常肌肉酸痛有分急性同延遲性兩種，前者自然係喺訓練後立即感到酸痛，原因係肌肉短暫性缺血，乳酸積聚所致，一般馬上做active rest，即時做放鬆運動就幾乎會馬上復原，right？」
我點頭同意：「嗯，無時無刻，一停低就會抖動雙臂同肩膊震鬆肌肉，而且正常操完後都會有放鬆嘅時段。」
米叔又繼續說：「而家你係第二種情況——DOMS，延遲性肌肉酸痛一般喺劇烈運動後嘅12到24小時開始出現，仲會有肌肉的僵硬同無力，48到72小時會痛到頂峰，症狀有可能持續五到七日喎。引起DOMS嘅主因，明顯就係肌肉唔習慣超量訓練，或者係久休後重新投入運動訓練。」我跟阿心對望一眼微微點頭，心諗真係中晒喎。