《我老婆唔係我女朋友》【那些年／學界比賽／真人】 第四章至六章: 【第五章】 牛津跌打佬（２）
適時心爸隔著房門嗌米叔：「喂Mic，我返去睇舗先，阿仁第日得閒嚟食餐飯啦。」心爸也順便跟我拜拜。
「See ya, oh mate, I want liquid suppa this evening。」米叔似乎同心爸相當熟稔，聽來似是吩咐心爸帶點甚麼過來。
我也隔空順便應道：「好呀，Uncle拜拜。」
「我食飯前帶打啤酒過嚟啦。」心爸回應。
「Lovely. Ta mate。」米叔講啲我唔明嘅英文。
我按他指示企起身望望嗰幾張證書，下面掛有一張超大的元素週期表（Periodic table）作裝飾，他只將這些證書掛在治療室內而不是舗面，刻意低調保持此為隱藏秘技，以免搶去跌打正宗的地位。
University of OXFORD Mr. Michelangelo Ko
University of Lincoln Mr. Michelangelo Ko
American Board of Physical Therapy Specialties (ABPTS) Ko Mai Ko, Michelangelo
既然你叫我睇，就姑且行近啲細心看看吧。嗯～都無幾多個字我識的…咦？OXFORD我識喎！「牛津」英漢雙解詞典，以前中學時都人手一本咁滯，雖然而家個個都轉用快譯通了。
巴隱閉哩，牛津大學畢業吖嘛，再睇落去，DOCTOR我都識，Neuro乜春就真係唔識了。咦喂？等等！牛津博士？！跌打佬？我睇緊乜嘢呀？
雖然我隻手遞唔起，但我仍然忍痛用手揉揉眼睛，慎防眼花看錯，門小你鹵味有圖有真相，唔係牛頭角嗰間津貼小學喎！
「牛…牛津博士？英國牛津大學喎！」我用高八度的聲音叫出來，意想不到石硤尾跌打醫館竟然有世界頂尖學府的醫生坐鎮，當真高手在民間。