《我老婆唔係我女朋友》【那些年／學界比賽／真人】 第四章至六章: 【第五章】 失驚無神見家長（３）
已經企咗起身的米叔，眼仔碌碌望吓我，又望吓阿心，再望吓心爸，最後乾咳一聲清清喉嚨，笑嘻嘻的對我說：「Lovely，一係就無客，一嚟就咁齊人，我哋入去治療室『驗傷』先，等佢兩父女catch up吓啦，Shall we？」帶頭領我行入舗內的房間（用簡陋的木板間隔開）。
我用求助的眼神望向阿心，她點頭示意用口形說：唔怕。
我慢動作經過心爸面前不忘向他打招呼：「Uncle，你好。」呢樣嘢我醒目嘅，話唔定係未來XX嘛。
他相當和氣的回應：「你好呀，點稱呼你呀？」
「哦，我叫阿仁，我入去先喇。」心爸頭髮灰白梳了個短髮平頭裝，是身形瘦削的鋼條身材（阿心食極唔肥似乎是遺傳自老竇），因為坐著所以身高不詳，容貌相當和善，是典型士多老闆的形象。三人當中，似乎只有阿心最嚴肅。
尾隨型棍跌打佬入治療室坐好。「點呀後生仔，好似整嚫back and shoulder喎。」四診法的「望、聞、問、切」唔需要做足，米叔只是齋望都講得出症狀，看來我掗吓掗吓嘅生嘢樣都幾嚴重。
我有點奇怪：「師傅，點解你未問都知嘅？」
米叔接口說：「Well，見你行路就住就住就知啦，除咗衫等我睇吓個膞。嘩，啲肌肉好緊喎，嗱我噉樣拉高手臂痛唔痛？（我：痛…痛～）how about that？（我：哎吔，超痛～）Holy cow！琴日捽過乜嘢呢？啲皮膚都傷咗喎（我：搽咗冬青膏，貼咗脫苦海）。Aight，都唔算太嚴重嘅，點樣整嚫㗎？」條友一輪嘴又中又英，好似坊間所講扮歪國人的ABC，奇又奇在佢有正宗英國口音，感覺非常新奇，不過佢啲英文我大半是靠估的（唉～如果我英文咁醒就讀咗【灣大】啦，我啲水平止於I go to school by bus而已）。