《我老婆唔係我女朋友》【那些年／學界比賽／真人】 第四章至六章: 【第五章】 失驚無神見家長（２）
出了石硤尾站，她帶我沿石硤尾街一路行到大埔道路口轉右，在油站斜對面的一家跌打醫館停下。啊？原來睇醫生就係睇跌打。這家跌打醫館屹立在大埔道很多年了，彷彿自我有記憶以來就已經存在，然而雖然份屬多年老街坊，卻一直未有光顧過，反而最令我有印象的是這家醫館的名字，無論向前讀或倒後讀都是一樣的——【高米高跌打醫館】。
「Uncle Mic（米叔）間舗喺呢度好多年喇，佢爸爸退休就由佢接手。」阿心推門入去時順口介紹。
入門迎面掛有一幅筆意蒼勁的大字，上書「骨科聖手」。
「咦，大妹？嚟搵老竇呀？」一個中年人坐鎮舗內，說話帶有濃重的鼻音，看來跟阿心相熟的。
「米叔，唔係呀，我帶個朋友嚟睇症呀。」那個米叔站起來指示我們坐到旁邊診症區，所謂診症區其實只是一行長椅，讓客人等候或是敷藥時坐著休息。
同時間有另一把男聲叫阿心：「心穎？唔使返學咩？」原來診症區有另一個男人坐著在跟米叔吹水。
「欸，爸…爸…？你喺度嘅？」阿心驚訝的說。
吓，爸爸？唔係咁尷尬吓嘛呀。一時間大家都好像定了格一樣。
米叔年紀不算大，人到中年但仍有濃密烏黑的頭髮，唯獨是兩鬢如霜，似是經歷了半生風霜的印記，他的身高和我差不多，卻是位身材魁梧穿件工字背心的大隻佬（那些年陽剛電影如《第一滴血》、《未來戰士》等大行其道，使得人人都去舉吓鐵搞健身），鬼鬼哋的他容貌輪廓分明，高眉深目、鬚根滿面，咁型棍嘅跌打佬都是第一次見。