《我老婆唔係我女朋友》【那些年／學界比賽／真人】 第四章至六章: 【第五章】 失驚無神見家長（１）
失驚無神見家長
難得今天有心媽湊放學，但身體的疼痛卻是貨真價實的，所以回程石硤尾時仍是一步一地獄，在地鐵上實在是痛得不得了，加上昨晚又輾轉反側，只好睡在阿心的肩上假寐一會。
她關心的問：「好痛呀？」
「嗯…幾啦，唉～我係唔係好無用呀？」我哼哼唧唧的，現在深切體會到甚麼是身心俱疲了。
她有點微嗔：「我清清楚楚話你知，唔係！唔好亂諗嘢呀。你身體承受嘅痛苦，其實係代表你日後會變得更強壯！你哋成日睇《龍珠》，唔係話嗰啲乜亞人經歷瀕死之後，會愈變愈強咩？任何運動員喺傷患期間，心理狀況都會經歷最脆弱嘅時刻，但呢一刻其實亦係獲得新力量嘅開始，所以一定要有信心！」她總有辦法轉移我的注意力，讓我不會常想著痛。
我驚訝得坐直了身體：「係撒亞人啊，妳連《龍珠》都識嘅？」
她微笑著面有得色：「我無聊都有睇吓電視嘅，仲成日話我鄉下婆～」
我好奇的再問：「王醫師點解連運動員心理都有研究嘅？妳唔好突然同我講，妳其實係學界冠軍呀，我接受唔到…」
她白我一眼，輕輕拖著我：「都話運動白癡喏，點會係學界冠軍呀。」再瞟我一眼。「大男人啦你，我係鄉下婆你就最開心，啲運動員心理係一陣間去睇嗰個醫生講㗎。」
「嘻嘻，點會呢，無王醫師心理輔導，我跳咗樓啦，我先係鄉下佬。」哈，我大男人佢又睇得出，鄉下婆真係了解鄉下佬的心理。