《我老婆唔係我女朋友》【那些年／學界比賽／真人】 第四章至六章: 【第五章】 阿仁你…生嘢呀？（４）
所謂醜事就傳千里，何況有「生嘢」咁juicy嘅噱頭，繼上次「減壽的阿仁」被人唱到街知巷聞之後，今期「肥仁生嘢兼疑似不舉」又再次成為吹水系師生間的熱門話題。
掗吓掗吓躝到去運動場，在場畔長椅找到阿心，她一見到我就皺眉：「做乜行來行去呀？一陣俾人撞嚫呀。」
我苦笑著點頭：「太遲嘞，已經撞咗喇。我驚妳悶想攞隻碟畀妳嘛。」
「坐低先啦，你激死我喇。」她跺足嗔道。
我挨著她坐下，涎著臉的說：「唔好話我啦，我已經好痛喇。」乘機黐吓佢、嗲吓佢，呢個女朋友呢，受軟唔受硬的。
果然，她一副沒好氣的樣子，沒有再責怪我。「我唔悶呀，我頭先打咗電話去問過，一陣放學我哋一齊去睇醫生。」
「吓！我諗都係肌肉疲勞啫，睇醫生咁嚴重？睇學校獸醫都得啩？」確實以前的肌肉疲勞，都是叫老媽隨便捽兩嘢就算，搞到要睇醫生咁大鑊真是想也沒想過。
話說學校醫護中心的醫生我們都戲稱為獸醫。
她惱懆的瞪眼盯我，提高聲線的說：「你連行出街都有問題，噉都唔叫做嚴重咩！」幾乎想叉腰罵人。
「係嘅，係嘅，妳陪我去睇啦，好嘛？唔好勞氣。」《姊妹》有云：愈在乎就愈緊張，愈緊張就愈煩躁。真好，阿心真的好緊張我呢。
她斜眼看我冷冷的說：「乜去睇醫生都咁開心嘅咩？」
「無，無，邊有呢，好彩有妳陪我咋。」又被佢睇穿我暗爽，真失敗。
她蹙著眉不悅，惡狠狠的吩咐說：「仲嬉皮笑臉喎，你唔知我好擔心㗎咩？放低隻碟好快啲返去上堂啦，慢慢行呀！」
「嘻嘻，知道喇女皇，苦中作樂啫，唔通吓吓都苦口苦面咩。」跟她說完我又掗吓掗吓返上課室。