《我老婆唔係我女朋友》【那些年／學界比賽／真人】 第四章至六章: 【第五章】 心媽湊我返學（５）
以往由我家去【大力水手】，都是10分鐘腳程左右，今早我卻足足躝了25分鐘，去到時阿心已經在等了，她看到我以超慢動作十足「中槍阿琴」噉款走進來，神色顯然有點慌張。「你噚晚明明話好咗啲嘅？點解好似仲嚴重咗㗎！」
我慢慢的坐下來，盡力避免牽引到痛處。「我都唔知呀，唔知係唔係啲攰氣散出嚟，琴晚半夜開始發作喇，而家隻手完全遞唔起。」我苦笑著解釋。
阿心緊張的問我：「唉～點解咁嚴重㗎，好痛呀？食唔食到嘢呀？」
「妳幫我切開細細粒，我用單手慢慢叉都得嘅。」反正都是食齋多士，無太大問題。
差不多吃完早餐，一直抿著嘴的阿心突然說：「今日我陪你返學啦。」
「吓？！妳今日off喎，我自己返都得啦。」我不想麻煩她休息日都要返學校。
「嗯，就係放假先有時間嘛，你隻手又郁唔到，起碼我都可以幫你孭袋啦，我話一齊返就一齊啦。」她輕蹙眉頭，罕有以決絕的語氣說出來。
口說不想麻煩她，可是身體卻很誠實，事實上傷勢比想像中更嚴重，簡單如掏出銀包，地鐵閘口入票（那時未有「八達嘟」的，要入票過閘機的）等的動作，都要超慢和就住就住，最後索性將銀包都交給阿心了，而我就好像皇帝出巡一樣，沿途有人打點出入。弔詭的是表面好像很威風，但內裡就實際是好陰功～