《我老婆唔係我女朋友》【那些年／學界比賽／真人】 第四章至六章: 【第五章】 心媽湊我返學（４）
突然醒轉過來，仆街原來發惡夢！仲真實到自絕呼吸，身體扮到真係溺水一樣。
好日都唔會發惡夢，瞓到半夜無端端扎醒，百思不得其解，正想用手捽一下眼，那知道稍一郁動，竟然痛到叫了出來！我發覺肩膞以下完全使不出力，勉強用力就會牽扯到兩邊膊頭，真的痛不欲生，而且我還感覺到貼著「脫苦海」位置的皮膚有如火燒一樣，真的是禍不單行，是肌肉和皮膚雙重痛楚的夾擊；當下只能用超慢的動作，緩緩伸手去搣咗兩張「脫苦海」，然後掙扎著起身去照鏡，我頂～脫苦海貼印的位置通紅，觸手超痛，似乎是嚴重皮膚過敏，而整個肩膀的肌肉也在發燙。
昨天還勉強可以將兩臂提到膊頭高度，現在只能低垂雙臂（大家有睇《國產凌凌漆》吧，阿琴被「蠱惑的槍」連環打中，低垂著兩臂行走的形態，就是我現在的寫照了），單靠手腕的轉動，屙尿沖廁都還可以應付，但刷牙、飲水、打電話等的日常行為，都要花上3倍時間才能勉強做到，還要承受著銳心的皮肉之痛！
在床上輾轉反側，好容易攤到9點，用超慢動作撥電話給阿心，特別叮囑她遲一點才去食早餐，好讓我有時間慢動作換衫，而且家住唐樓，落樓梯時的肌肉震動，也牽連到產生極度痛楚，不得不步步為營。