《我老婆唔係我女朋友》【那些年／學界比賽／真人】 第四章至六章: 【第五章】 心媽湊我返學（２）
阿心終於察覺到我的不妥，連忙接過碗米粉，緊張的拉著我手問：「點解隻手震得咁緊要㗎？！你撞嚫咩？」
「哎呀～妳唔好咁緊張，輕力少少，掂吓我都痛呀。」我接著一五一十講返今早的訓練情況給她聽。
「不如你試吓舉起手舒展吓吖，睇吓會唔會好啲？」她的表情愈來愈凝重。
我嘗試舉手，哪知道雙臂一去到膊頭高度就宣告玩完了。「唔…唔得，真係好痛，不如妳將碗粉放喺後面，我將就啲食咗先，我肚餓呀。」運動場看台的長椅是一級一級向上的，放後面就好像放高在枱面一樣，只要擰轉身坐就不用用手捧著吃。
勉強吃完後，著實痛得太厲害，想想還是走堂回家休息比較好。「我唔上堂嘞，我等陣叫馬飛幫手點名就得喇。」
「你…你自己返屋企得唔得㗎？」阿心憂心忡忡的問我。
傻妹真的很擔心，我只好安慰她：「我頭先都係噉樣返學啦，以前練水都試過手痛腳痛㗎喇，唔怕喎。」口上說的只是安慰她，事實是今次的「不舉」比以往都嚴重多了。
我和她一起行去上堂的lecture hall，邊行邊說：「我返去叫阿媽捽吓冬青膏會好㗎喇，妳今晚補完習先搵我啦，唔使擔心。」看她皺著眉的走到車頭位，我匆匆跟馬飛交代兩句就返歸了。