《我老婆唔係我女朋友》【那些年／學界比賽／真人】 第四章至六章: 【第五章】 心媽湊我返學（１）
心媽湊我返學
「……喂……爛瞓豬…起身喇…喂…夠鐘食飯喇。」聽到阿心在我耳邊輕聲喚醒我。
自從有次在lecture hall瞓被人投訴打鼻鼾後，現在晨操完提早回到學校，我都在運動場的長椅上睡；事關去common room（學生休息室，一般會有電視、沙發、汽水機）成日有人打牌、賭啤、睇電視…嘈到瞓唔到，去「拉把」靜過墳場，一打鼻鼾又是死路一條，反正天氣還是涼涼的，索性到室外長椅瞓，都是蠻舒服的，除了今天…
「爛瞓豬，好起身食嘢囉喎，仲有一個鐘就上堂喇。」阿心又催促我起來。
話說有妙齡少女在耳邊軟聲喚你起床，都算是毒隱的另類人生成就呢。
平日晨操完提早返校，我都會掩掩揚揚去lecture hall「通知」阿心，讓她知道落堂後來運動場邊，找我這個瑟縮一角的「露宿者」，有時她會買埋午飯來找我。
我坐起身，不禁輕聲叫了出來，哎～仆街瞓咗之後個膊頭仲痛過今朝！
阿心坐在旁邊聽著歌等我，聽不到我的慘叫聲，她繼續說：「飯堂見唔到你個樣，扮唔知有『健康餐』呀，餐牌又無，嗰個收銀仲串我咁瘦唔使減肥呀。所以今日買咗沙嗲牛肉米『走』沙嗲牛肉畀你，嘻嘻，唔好問我點樣走沙嗲牛肉喎。」
我跟她說：「我食唔到嘢呀～」
她以為我嫌棄沙牛米無沙牛。「唔好扭計啦，你減肥係噉㗎啦，我食剩咗少少牛肉碎畀你過吓口癮㗎喇。」
我都無認真考究過佢係體貼、刻薄定為食，哈哈～
「唔係呀，我隻手用唔到力呀。」我吃力地捧起碗米粉給她看，但雙手痠軟下垂，用不了力及不停抖震，彷彿得了少年柏金遜症。