《我老婆唔係我女朋友》【那些年／學界比賽／真人】 第四章至六章: 【第五章】 廢青升呢殘廢青（４）
送了亞里仔上車，我和肥直一起行去坐地鐵。在路上他解釋：「嗱，今日應該知點解山長水遠都要訂【灣仔池】啦，練『垂直蝶式』一定要個池夠深，以前我哋喺跳水池練㗎。」
「嘩～阿直，好隱辛苦呀！從來未試過個膊頭咁攰㗎，而家隻手遞唔起呀…」我忍不住向肥佬投訴。
「你都聽到我同亞里仔講啦，操完肌要唞48小時嘅，所以呢兩日休息下唔好練住，夜晚要食吓蛋同橙，促進肌肉增生嘅。好啦，見你話辛苦，你聽日休息一晚唔好返麗池嘞，同埋呢得閒可以按摩吓『肩井穴』，係頸至膊頭中間後方位置，按壓可放鬆肩膊肌肉㗎。」肥直一邊說一邊摙我膊頭示範。
「𠽌…喂…好痛，哎呀…好痛呀～」原本肩膀已經痠軟了，還被他一指定中原，痛上加痛。
「唏～後生細仔，咁渣㗎，兩成力咋。」肥直不屑的說。
「唉～阿直呀，我隻手好似廢咗噉呀，又冤又攰。」我痛極呻吟。
「攰咩？攰就啱喇，舒服係留返畀死人嘅，我預先話你知吖，聽朝起身仲甘呀。喂，條路你自己揀㗎嘛，跪都要跪埋佢㗎啦。」肥佬鼓勵人的方法真是洪拳正宗——硬橋硬馬，聽得多真係會懷疑人生，意志力稍弱真係會行去隔離灣仔碼頭跳海算了。
好彩佢無好似以前死老坑講埋啲「面對辛苦、克服辛苦、超越辛苦」風涼話，如果唔係真係手痛都打窒佢。
唉～不了，都是返去搵心媽呵下好過。