《我老婆唔係我女朋友》【那些年／學界比賽／真人】 第四章至六章: 【第五章】 功夫兩個字 游水都係（１）
功夫兩個字 游水都係
「亞里仔，你有無聽過一種南方拳術叫洪拳呀？」一個星期後，肥直提出每逢星期四，都做一天高強度訓練，誰知在池邊簡報訓練內容時，失驚無神的講起洪拳。
阿里仔用充滿疑惑的眼神跟我對望，企圖從我面上找到答案，我也摸不著頭腦，只好緩緩擰頭。
「有聽過，但唔係好識分囉。」阿里仔都係醒目仔，hea答唔會死嘅。
「明末清初時，洪拳由洪熙官引入廣東，都有幾百年歷史嘞，你哋熟悉嘅黃麒英、黃飛鴻、林世榮都係洪拳宗師。」肥直開始介紹洪拳。
聽到佢講林世榮，我輕輕踭了亞里仔一下，他微笑著斜睨我一眼，明顯知道我說肥佬。
肥直繼續陶醉在他的洪拳歷史：「洪拳硬橋硬馬，橋就是橋手，馬就是馬步。」說著時他將一隻手擺成姆指內勾，食指指尖向上，後三指緊貼手掌，掌心向前，猶如食指伸直的虎爪（找張《IP Man 2》的海報，看看洪K寶的招牌架式），他將這手印放在胸前位置向後帶同時吸半口氣，再向前徐徐推出又同時「呵～」的吐氣。「嗱，呢個『一指定中原』嘅架式，可以話係洪拳其中一個標誌性動作，配合呼吸重覆鍛鍊，可以增強勁力，強壯肌肉，所謂以身調氣、以氣催力。由於清朝時有『禁武令』，所以前人就用大智慧，只靠自力唔用器械，都能夠持續噉低調鍛鍊體魄。」