《我老婆唔係我女朋友》【那些年／學界比賽／真人】 第四章至六章: 【第五章】 個個都游水 唔通個個都識游水咩（６）
「唓，你代表學校比賽嘛，佢哋關心吓都正常啫，況且唔畀人哋中學時有練過水咩，你估個個都好似我運動白癡咩。」阿心理所當然的說。
聽到她這樣分析，雖然覺得馬飛班友有啲古怪，也就不了了之了。「喂，運動白癡，不如我教妳游水啦？」我笑著調侃女友。
「我識游水㗎，使鬼你教呀，你又唔係勁。咦～你頭先講乜嘢白癡係話邊個話？」似乎反過來是她調教男友。
「白癡話妳呀。」我不虞有詐。
她忍住笑：「噢，原來有個白癡話我。」
如是者每星期逢二、四有兩天晨操，頭半小時的偷雞時間，由肥直貼身鞭撻，然後加鐘一小時跟明日之星拍跳，接著逢一、三、五麗池晚操暨義務助教，休息（睡覺）時間就安排在課堂中進行，幸好仍能夾啱時間陪阿心上堂和返放學，有時晚上又會約佢去食吓孖條溫馨下，總算未有冷落了她，日子過得非常充實。
另外肥直評估我的進度，預計我有機會可以入到決賽，因此提醒我可能需要應付多於兩場的比賽（50自初賽和接力賽），要我自己考慮操練體能，這是懶散的我最不願意的；言談間他聽說我家住唐樓，每天要徒步上落五樓幾遍，就建議我加以利用，善用樓梯作為訓練場所，做法相當簡單，只需要極速的快上快落就行了，後來再加上送阿心回家（又是撐十層樓梯）時，也同樣作出快上快落（個衰妹只跟在我後面慢慢上…），變相地雙倍訓練體能。
（體重80kg，50自31秒，距離比賽尚有4個月）