《我老婆唔係我女朋友》【那些年／學界比賽／真人】 第四章至六章: 【第五章】 個個都游水 唔通個個都識游水咩（５）
「你話因為教小朋友改良泳式，反而修正咗了自己嘅動作，甚至游快咗？嗯～」阿心思索了一會，搖頭擺腦的吟誦：「《禮記》有云，學然後知不足，教然後知困。知不足，然後能自反。知困，然後能自強。故曰：教學相長也。中學時學過㗎，記唔記得呀？」
我眼核都幾乎跌出來：「點解妳會記得㗎？仲出口成文咁勁嘅？我考完會考嗰晚就唔記得晒喇。」
「嘻嘻，我無咁叻，啱先前日補習時解過一次啫。嗱，上次叫你有能力唔好收收埋埋，而家中晒啦，如果你唔用你嘅能力去教人，點會令自己有頓悟呢？師生互有得著，呢啲咪就係『教學相長』囉。」心媽又當我是補習學生來教了。
見個衰妹懶係學識淵博，我醒起剛才馬飛又彷彿通曉游泳專業名詞，不如睇吓阿心會唔會都識。「呀，我問妳吖，妳知唔知乜嘢係50自？」
「嗯～係咪50呎自由式？」她有點疑惑。
「哦，都差唔多啦，係50公尺或50米都得，噉200四呢？」我又再問。
「呢個真係唔知嘞，200公尺啩，四係代表乜嘢呢？」她也答不上了。
「四代表個人四式囉。嘩，頭先馬飛自己噏到晒呢啲行內術語出嚟，好似對游水好有研究噉，仲好關心我嘅狀態添。」我將心中的疑問告訴她。
我當然省略了「白恤衫、大燈籠」的福利事宜啦，真係買棺材唔知埞咩。