《我老婆唔係我女朋友》【那些年／學界比賽／真人】 第四章至六章: 【第五章】 個個都游水 唔通個個都識游水咩（４）
「咦？200四你都識講，行家嚟喎，無啦，游50自都夠我死喇。」親切的慰問和貼心的打氣安排，使我竟然跟馬飛有相逢恨晚的感覺。
「哦，賽一場即係無過關飛啦。咦，呢輪減肥減成點呀？好耐無一齊食飯囉喎。」對馬飛經常夾雜賭馬術語，我都開始不以為然了。
「哎呀，唔好提喇，食烚雞烚菜真係想自殺呀，都係減咗1kg咋。」真難得有人願意聽我呻吓食減肥餐箇中的辛酸。
馬飛語帶安慰：「哦，即是未收身呀吓。唔緊要嘅，我哋班同學一定支持你嘅。你今朝晨操完實好攰嘞，瞌吓先，落堂我叫你。」
「好呀，唔該先。」事實昨晚還在麗池開工，今朝又4點起床，還真是有點攰，反正都係諗住返來瞓啫，佢問嗰啲都係作為同學支持一下，所以都不太在意。坐一陣倦意來襲就瞌著了。
一直瞌到馬飛叫醒我，原來已經落堂，夠鐘放飯了。
待課室中眾人四散後，阿心蹙著眉行過來低聲跟我說：「你要練早場咁攰，返屋企休息吓嘛，咁早返嚟做乜啫？」
「嘻嘻，想見妳嘛，我喺度瞓一樣啫。陪我食飯吖，我今朝4點起身到而家食咗兩塊多士咋。」梗係乘機嗲吓心媽先啦。
去到Canteen找了個無乜人的死角位，先去了買午餐，個仆街收銀又扮傻說不清楚甚麼叫「健康餐」，係都要我講「減肥餐」才一副如夢初醒的模樣。安頓一切後，輪到我報告今早的所見所聞了，阿心對亞里仔的事似乎無甚興趣，反而對我的成績和早上的領悟比較關心。