《我老婆唔係我女朋友》【那些年／學界比賽／真人】 第四章至六章: 【第五章】 明日之星的陪練員（１）
明日之星的陪練員
我楝在門口一邊震，一邊聽肥直說：「嗱記住，一陣介紹嘅時候，我係黃教練（我搭嘴：你？黃教練？😅）唔好笑呀，你係陪練員，嗰兩條線係私人租嘅，聽講話有個後生仔好有潛質，佢伯爺唔知喺邊度搵到我以前個教練（我搭嘴：你個教練？），係呀，以前大陸個省隊教練，都退咗休嘞，佢特登喺大陸打電話嚟我屋企，叫我幫手指導吓個後生仔喎，噉我咪順手拉埋你嚟囉，你要練爆炸力吖嘛，嗱我買一送一，反正你做陪練員合情合理，我又順便一雞兩味。」
他續說：「你諗吓嗰個大頭好臉（潮汕話愛面子）咁著緊招呼呢個後生，我幫佢哋入紙租線撻佢伯爺個朵，總會同泳池辦問都唔問就租畀佢，所以佢伯爺應該有啲背景嘅，一陣唔該你醒定啲，咪失禮人呀。」原來如此，肥直一直有記掛住著我的事。
我不禁有點奇怪：「噉點解我有半個鐘自己霸晒兩條線嘅？」
「唏，偷雞㗎咋，佢租線係6至7點，反正6點前唔會有其他人用㗎啦，我哋提早嚟用，啲管理員理隱得你啫。」肥直理直氣壯，中氣十足的說出來。
「阿直，一陣係咪唔好講粗口好啲？」我突然醒起應該稍為收歛一點。
講粗口就如和尚寺中學的鄉下話，再加上在「粗口會」的深造，我輩畢業生在日常應用當中，各種詞彙、語境、意形、修辭技巧都可說是達到宗師級數，再者我們以前的中文科老師，可能因為大家清一色是「公」的關係，教學氣氛比較豪邁，也樂於在正課之餘跟我們討論這種「次文化」，也多得那時候未有直播、錄音甚至篤灰文化，使老師們能夠無後顧之憂，給我們講授多點另類知識。