《我老婆唔係我女朋友》【那些年／學界比賽／真人】 第四章至六章: 【第五章】 小粉皮是泳式督導員（３）
在最後100公尺雖覺疲累，但仍能透過手掌清晰地掌握到水的支撐點，整個人的水感非常強烈，只是體力未能繼續有力地推動自己前進而已，這種感覺只有自己才能感受到。似乎這段復操的日子正逐漸邁向正確的方向！
「衝塘第一次50自31（秒），第二次32。手呀～推水未夠盡，尤其是尾段無力時更加明顯，小兒麻痺噉嘅？手踭遞高啲嘛，又拖晒柴！休息完重覆游多組400／50／50，跟住放鬆上水。」肥直清楚明白的指出問題所在。
「係～知道～」我唯唯諾諾的應道。大佬呀，無力梗係推唔盡㗎啦，昨晚麗池開完工，今朝又早過雞起床，我廢青咋，你估我隔離線嗰啲港隊咩。
話說隔離線班港隊正在全力備戰第一屆東亞運動會，個個都操到不似人形，成班人天寒地凍時扯氣、換氣所呼出來的暖氣竟然結集到好像溫泉水蒸氣一樣。
第二輪的時間是34／36（秒），每況愈下，就算已經在「翻閹」都幫助不大，看來要再加把勁。上水後肥直拉我一起出泳池正門外，我撻住條索水布喺頭上，髮尾仍在滴水，上身只穿件Tee，濕水雞一樣凍到狗縮。
索水布是那幾年才推出的纖維質料吸水巾，面積細易於攜帶，又一扭即乾，免卻以前日日練水都要帶條大毛巾的麻煩，最好是不用再被老媽囉嗦隔日要洗晾毛巾，所以當時新產品一推出，即受到水系人士的追捧，可是各游泳品牌初賣時都要接近200大洋一塊，最終窮隱們去了陀地秋葉源——鴨寮街，發掘出相同質料的抹車布做替代，只費30大洋。是呀，無商品贊助係噉㗎啦，抹車布當索水布用囉，唔係咩呀。