《我老婆唔係我女朋友》【那些年／學界比賽／真人】 第四章至六章: 【第四章】 翻閹泳法（３）
可能見大聲喝我之後，我有點膽怯，所以他稍為放軟聲氣：「嗱，你呢種久休復出嘅情況，我都見過唔少嘅，你知唔知以前喺大陸有過一場紅色大運動吖？」
我點頭示意知道，因為我住石硤尾，街坊尤其是上了年紀的阿叔、阿嬸，幾乎都和那場超過十年的運動有點瓜葛；那些轟烈（參與者）或慘烈（受害者）的事跡，我自小已經在街頭巷尾，聽得耳熟能詳了，只是沒想到又會跟游水扯上關係啊？
肥直眼裡泛著點點回憶：「其實嗰陣場運動已經完結，發配上山下鄉嘅知青，都獲批准『大返城』，可以返去原籍省市繼續學業或工作。所以以前原本有做開訓練嘅泳手或者教練，都有機會『復崗』，重新投入日常訓練。」
說到這裡他停了下來望著我，因為我面上開始浮現黑人問號。
「又乜嘢呀～」他不耐煩的問我。
「誒…乜嘢係『福岡』呀？」熱愛日本文化的我，自然有聽過九州福岡這個地方，但完全聯想不了跟大陸有何關係。
「呵，『復崗』即係恢復原來嘅工作崗位。啊呀，香港人叫做『翻閹』先啱。」肥直欣然幫我翻譯，似乎想當年令他心情好起來。
他接著再說：「嗱，呢班人長時間無咗訓練，一旦重新投入，就會有水土不服嘅症狀，因為閒置咗嘅身體同舊習慣唔協調，當然體能衰退亦都係問題，所以短時間內唔係要身體去適應，而係要改變習慣，協調訓練令身體能夠負荷，按部就班先改返用舊習慣或技巧。」