《我老婆唔係我女朋友》【那些年／學界比賽／真人】 第四章至六章: 【第四章】 會讀心的心理醫生叫阿心（１）
會讀心的心理醫生叫阿心
晚上到西邨找阿心，她已經習慣穿街坊裝見我了，小雲look、披長髮、戴頭箍、踢拖鞋。她拖著我穿過大坑西街去到南山邨商場外面，在大樹下那些長石凳坐下。
在昏黃的街燈下，她稍稍端詳了我一會：「嗯～睇樣你都無乜嘢吖，等我一陣。」
鬆開我手，抽手去打開一個小包裝袋，原來她帶了包橙汁孖條（阿波羅對對棒），熟手的一分為二，順手餵了半條到我口，又再拖返我。
「嗱，同你一人一半喇，我問過教會啲姨姨，孖條減肥都食得嘅，你又未食飯，食啲甜嘢精神啲。」沒想到半條雪條背後都有心媽的關懷，她溫柔的望著我繼續說：「點呀，小朋友做乜唔開心呀？」
我吃著雪條正自發怔，有點愕然然她又發現了我鬱悶的心情。「點解妳又會知道我唔開心嘅？今晚第二次有人發現嘞。」我將請細豬兩兄妹飲思樂冰的情形說給她聽。
她笑得很開心：「連細路女都睇得出，你知唔知你自己乜嘢都寫喺塊面上㗎？你個人單純又唔識掩飾情緒，開心就開心，憂心就憂心，有人會覺得你呢種人唔成熟囉。」
我有點不滿：「係咩…」
「你聽我講埋先啦。」她握了我的手一下繼續說：「但我覺得呢，你對人無機心，耳仔軟又隨和，有時明明見你表情唔想做啦，但又勉為其難照做喎。所以呢，加起來我反而覺得呢樣係你嘅優點，你畀人知道你就算不太願意，依然會努力去幫人。你記唔記得以前我特登叫你嚟接我，你都難為了家嫂噉，逆來順受都幾好笑㗎，但有時就優柔寡斷咗啲囉。」