《我老婆唔係我女朋友》【那些年／學界比賽／真人】 第四章至六章: 【第四章】 唔試好過試（５）
兩兄妹帶我過天橋去東京街那邊的「些粉」，兩個細路飲思樂冰（明明淨係請細妹，條肥滯又老實不客氣噉順便叫埋），而我減肥中，只能飲支裝水！
「仁呱瓜，點解你唔飲思樂冰嘅？」妹豬無疑是比佢大佬精靈。
「哦，我遲啲要比賽，所以要減肥，只可以飲水。」其實我都不知幾想大啖大啖「隊」可樂。
「你頭先輸咗畀阿瓜（哥）呀？」
「呵，差少少輸啦，差兩秒咁大把。（肥滯在後面輕聲插嘴：挑～我會輸？）」我輕鬆的答她。（明顯是大蝦細）
妹豬接著爆出令我吃驚的一句：「噉你點解好似唔開心嘅？」
「吓！？妳又知我唔開心？」我非常驚訝，一個小妹妹居然咁挑通眼眉？
「我阿媽話如果唔開心會成日皺眉囉，所以我以為你輸咗畀阿瓜囉。（肥滯繼續在後面輕聲搭嘴：挑～我會輸？）」妹豬開咗老人精mode侃侃而談。
「哈哈，無事呀，無端端點會唔開心呢。」妹豬觀人眉頭眼額的能力不容小覤，精乖伶俐的程度直追我家的隱蔽女神，搞到我突然好想見吓阿心，跟她報告今晚有幾失敗。想了想事不宜遲：「喂，飲完好返屋企喇，我都走嘞。」
順道在「些粉」打畀阿心。
「返到屋企嗱？食咗飯未呀？」女友親切的聲音傳來。
我語氣中透著疲累：「未呀，啱啱喺泳池出嚟咋，妳得唔得閒？想見吓妳呀。」只是聽到她的聲音，已經起著療癒的作用。
「無事吖嘛，你喺邊度？」似乎她也聽出我的異樣。
「無乜嘢，我仲喺麗閣，我坐小巴過嚟好嘛？」
「嗯，好啦，你到樓下再打畀我吖。」