《我老婆唔係我女朋友》【那些年／學界比賽／真人】 第四章至六章: 【第四章】 唔試好過試（４）
「得啦，游咪游囉，但你一陣照請我阿妹飲汽水得唔得呀，佢好耐無飲過喇。」阿肥滯雖然衝動，倒也直腸直肚，單純得可愛。
「好吖，我都想飲，一齊囉。」既然我贏咗牙骹，幾蚊雞又有乜所謂呢。（但明顯是大蝦細）
離開更衣室，在泳池出口等妹豬，口旱旱跟細豬有一句沒一句的搭訕。「你兩兄妹住麗閣㗎？」
「唔係呀，我哋住元州街邨㗎。」細豬不假思索的答道。
「哦，點解會嚟練水嘅。」
「吓…之前有個劉老師見我成日都好熱噉，問我想唔想游吓水，涼浸浸好舒服㗎，噉咪帶咗我嚟囉。」細豬說出參與練水的緣由。
冚家祥咁似啲金魚佬昆細路女嘅情節嘅？
我覺得出奇：「劉老師？未見過嘅？」復操都差不多成個月了，整個泳會都是得肥直和我兩個成人，咳，我算年輕人好了。
「佢帶咗我嚟跟住阿直，就走咗喇，佢無游水。」哦，看來又是生性怕熱，被人昆來游免費水，舒舒服服噉泡泡水呢啲套路。
「咦？阿妹豬又會跟你一齊嚟嘅。」好少有個阿哥去到邊都拖住個妹。
「阿媽話開工無人睇佢，叫我帶埋佢嚟囉，阿直都話得。」這時妹豬出來了。細豬走上前拉住阿妹，指著我：「佢話請我哋飲汽水喎。」
妹豬喜出望外。看著我開心的問：「仁呱瓜（哥哥）真㗎？」
「係呀，同你大佬比賽輸賭汽水嘛，帶我去間7仔要有冷氣喎。」雖然二月天氣只有20度左右，但我人肥怕熱，經過大量運動後，身體仍然發滾出汗，極需要過冷河。