《我老婆唔係我女朋友》【那些年／學界比賽／真人】 第四章至六章: 【第四章】 菜潺的減壽日常（３）
開始這個減肥計劃，有兩個人最高興，第一個是茶記老細：「喂？食齋多？你搽牛油、果占、煉奶、花生醬我都係收相同價錢喎，齋多好蝕底啫，不如薄薄哋搽少少牛油啦。」第二個是我老母：「咦，好喎，淨食菜同湯渣，我慳返好多買餸錢呀。一早叫你減肥㗎啦，等我慳多啲嘛。」
因為午餐時連頹飯也不能吃，Leon對我說：「嗱，我問過家姐，佢公司有合作嘅藝人，減肥時都可以食烚雞胸肉嘅，我同廚房講咗，佢哋會幫你準備烚菜同烚雞。」他運用影響力拜託學校廚房特製「真・頹飯」來專門招待我，我除了眼淚在心裡流外，都不知可以說甚麼。仆街，白烚無鹹味雞胸原來比白烚菜仲難食㗎，嗰陣雪味…
我個為食妹仲喺旁邊調侃，今次千祈唔使客氣畀佢試食喎。
唉～你麻煩到廚房班大帝整菜單上沒有的東西，唔使多講又俾人串啦，「真・頹飯」準備好之後，大大聲嗌咪：「減壽…呀，唔係，係減肥餐嗰位同學，出嚟攞餐。」我有理由相信班友喺廚房不停講呢個係「減壽餐」。
除了叫咪那刻引起哄堂大笑外，出去取餐時幾乎要搵窿捐，全個飯堂的師生都爭相一睹我的風采；後來我拜託Leon再跟他們說，幫我定一個餐名叫「健康餐」，方便我在Canteen叫餐時用，起碼唔使吓吓叫「減肥餐」或「減壽餐」咁仆街吖。