《我老婆唔係我女朋友》【那些年／學界比賽／真人】 第四章至六章: 【第四章】 菜潺的減壽日常（４）
好啦，俾班廚房佬開大咪宣傳一下，幾乎半間【建橋】都知道吹水系肥仁要減肥了，連帶其他學系的同學見我行過都竊竊私語。每次去Canteen放飯時，大家都非常齊心的「支持」我，唔知點解嗰陣子特別多人「想」請我食飯，跟住又因為我乜都唔食得而「被迫」放棄，話唔好影響我的作戰大計，繼而影響學校成績，理由相當大義凜然，連表情動作都表現出萬分惋惜和遺憾。
平日上課時大家都有分享零食的習慣，往往由前後左右每行座位的傳來傳去，現在傳到我時，大家會自動波的跳過，馬飛之流更會大聲告警：「喂各位，阿仁係唔可以食零食㗎，大家合作吓唔好引佢。」除了本系科友外，最經典的是有一次，連TA（助教）也在Tutorial時問：「你哋係咪有一位叫阿仁嘅同學正在減肥？」我登時想搵窿捐。
我曾經抗議這樣會營養不良，條肥鬼仲反過來譏諷我，就是營養太過豐富。「想食沙牛麵呀？得嘅，嗱，你叫咗碗麵放喺面前，好似啲鬼噉，聞度氣啦。」搞到我即時想隊冧佢。後來佢再講返以前喺大陸時，有句形容運動員的順口溜，「起得比雞早，吃得比豬差，跑得比馬快」。我而家就真係吃得比豬差，要游得比馬快了，天啊！難怪無人願意做本地的全職運動員了。（這句大陸的順口溜以前是形容運動員的，只是近年被濫用了。）