《我老婆唔係我女朋友》【那些年／學界比賽／真人】 第四章至六章: 【第四章】 菜潺的減壽日常（２）
「嗯，阿兄都操得你哋幾乖，算不幸中之大幸嘞，飲酒係會降低爆發力、肌耐力、心肺功能，最終影響速度。而食煙更加係競泳比賽嘅大忌，對心肺耐力影響非常大，你嘅心肺就係你副偈，肺同氣管被污染，就無辦法輸出最佳功率，呼吸嘅協調能力受阻礙，即係點樣踩油架車都谷唔起，間接都影響咗負重的頻率。嘿，明唔明呀？架車谷盡都轉唔到波呀，啲死人巴士上斜蟻躝噉呢，聽到副偈谷到就嚟爆，但又硬係永遠轉唔上二波。」又是這些似是而非的理論，不過和以前老坑直的告誡都是同出一轍的，反正繼續唔煙唔酒就收佢皮了。
肥直要求我翌日就開始勵行減肥計劃，古有奧運金牌得主「珊潺」，今有廢青的新花名叫「菜潺」（係呀，食家蔡生的日本名，但人哋就食好西囉）。
減肥餐是噉的，早餐只能吃齋多士（最多兩片），飲品必須要戒奶和糖，午飯和晚飯能吃無油的烚菜，份量不限，加白飯半碗，晚餐可以追加大半碗湯渣瘦肉，必須要戒口，例如餐蛋麵、沙牛麵、炸雞髀、掃街小食和甜飲品等一律禁止入口，零食、雪糕等更是違禁品，在當年未流行營養學的年代，這是肥直自己研製的土炮減肥餐。