《我老婆唔係我女朋友》【那些年／學界比賽／真人】 第四章至六章: 【第四章】 菜潺的減壽日常（１）
菜潺的減壽日常
肥直接著說：「晚上嚟做掛名『陪練員』只能填充你嘅『莫氣』，根本未夠，你頭先話你50自最佳時間係幾多話？26（秒）？」
我點頭，同時心想，個紀錄咸豐年咁耐啦，現時肯定唔得。
他再說：「我班細路平均都係33（秒）左右，大家根本唔同級數，你做陪練只會愈游愈慢，反過來俾佢哋拖慢咗步調。」
我囁嚅著：「阿直…你等我跟班細路練返一輪先啦，我頭先俾佢哋啄呀。」肥直明顯捉錯用神。
他一拍額頭大聲笑道：「啊哈，係喎，唔記得你廢咗添，你啱，千祈唔好乞食婆想食笋果（潮汕話不自量力）。好，好，就噉安排先。至於操爆炸力呢，等我安排一下再話你知。」肥直說話都是兜口兜面的，不會轉彎抹角。
我心想，乜話？已經要一星期游三晚，仲有下文？想同阿心去行下街都無時間…當然我不好意思表示些甚麼，只好連聲感激。
最後阿肥直請我飲完支汽水，埋單時佢斜睥著我的肚腩跟我講：「除咗復操，你仲要減磅，要戒煙戒酒喎，細佬。」
我看著他跟我不相伯仲的肚腩，你咪五十步笑百步啦，生果佬～
口中當然唯唯諾諾的應道：「以前阿直唔准我哋食煙飲酒嘅，所以一直都無呢啲嗜好，除咗食嘢…我知道要減肥㗎嘞。」