《我老婆唔係我女朋友》【那些年／學界比賽／真人】 第四章至六章: 【第四章】 教練 總是肥佬呢（４）
他接著又舉例：「你知道啲非洲黑鬼運動員點解跑得特別快？因為太多獅子老虎喺後面追佢哋！」
我不禁滴汗，頂你，聽講呢個好似係爛gag嚟喎…
肥直自顧自的繼續說：「你話阿兄成日挑機呃汽水飲，一個幾毫呃你嚟托咩，計我話佢係要挑起你哋嘅鬥心，而九唔搭八都比一餐，就係想養成你哋對比賽壓力嘅免疫力，令你哋嘅心理素質，隨時隨地都處於作戰狀態。你諗吓，你同緊一個乜嘢級數嘅人比賽？佢畀到你嘅壓力並非一般同齡後生可以相比呀。」
我諗起條老坑挑機時個死人樣，不置可否的苦笑，心中在想，有無咁用心良苦呀你鹵味…
他呷了一口啤酒，自言自語：「阿兄以前幫我哋後輩好多，我初初入隊集訓時係無腳蟹（潮汕話孤獨無依），都係得佢關照咋，你估用『陪練員』嚟切入得唔得呢？」
我見佢好似自己同自己講噉，又唔知佢噏乜春，唯有垂頭飲汽水唔出聲。
接著他望著我：「嗱，阿仁，阿兄開到聲我實幫嘅，以後每一三五晚，你過嚟麗池做『陪練員』，我同泳會講你係我舊學生，想學做教練，而家義務幫手，唔使畀福利費。起碼練返順條氣先。」
「哦，做班細路伴游～使唔使好似舊時阿直（老坑）噉咬佢哋屎窟？」我想當然的說道。
他大聲的罵了一聲不知是甚麼的潮汕粗口：「我門小你屎窟呀，一陣人哋投訴你金魚佬，大家都無得撈嘞，你啄腳板好啦。」
我臉上一紅：「係嘅，係嘅，我會努力咬佢哋腳板喇。」