《我老婆唔係我女朋友》【那些年／學界比賽／真人】 第四章至六章: 【第四章】 教練 總是肥佬呢（３）
當晚我的練習不算辛苦，反正他叫我累了就休息，沒有一點壓力，只是好幾次被細路從後追啄腳板，意思是不滿我游得太慢，窒礙他們前進，無奈下只好讓在一旁，等他們先行，彷彿在水中也聽到他們「嘖、嘖」的不滿之聲。
一個半小時後上水，肥直叫我沖好涼，換衫後到泳池出口等，一起去麗閣邨茶檔傾一傾。
將事情始末和以往的戰跡講給他聽後，他想了想：「你如果係報50自（50公尺（米）自由式），最重要係回復爆炸力，耐力呢反而係其次。」
接著又詳細問了以前老坑的訓練方法，似乎是想從中找出快速地回復以往狀態的可能性。他沉思了數分鐘：「我似乎有啲掌握阿兄嘅訓練方法，其實佢係採用『陪練員』嘅模式，只不過係更貼身。我哋喺大陸好興噉樣㗎。」
「我知～伴游嘛，但佢淨係扮鯊魚咬人屎窟，同呃人汽水。」我帶點不屑的表情笑著說。
肥直不禁失笑：「所以話你班友身在福中不知福，有個省級運動員咬你屎窟，做你哋嘅『陪練員』，即係有無形壓力喺後面催迫你愈游愈快。」他頓了頓再說：「你有無聽過賽馬訓練，練馬師會安排『拍跳』呢樣嘢？兩匹馬喺操練時結伴快跑，會特別起勁，馬仔天生好勝，若然比同伴跑得快會有優越感。人都係一樣，你眼尾瞄到條鬼鯊喺後面，你就會不自覺噉加快速度，係嘛？」
我點點頭同意：「好似係～」