《我老婆唔係我女朋友》【那些年／學界比賽／真人】 第四章至六章: 【第四章】 《男兒當入樽》下的運動熱潮（３）
唉～好死唔死，真的估中了最壞的情況，我叫苦連天：「大佬呀，你失驚無神叫我去比賽，我退役都四五年喇，你睇我廢咗囉喎，十月懷胎有身己就嚟生得㗎啦。」考會考和預科那幾年，完全停止運動，肚腩一天一天的長大，變成了今天的超肥矮毒，以如此狀態都𠱁到阿心落疊，算是「真・神蹟」，應該備奉三牲酒禮酬神了。
「唔係呀，除咗接力之外，仲想你報多一個單項，頭先講過要入決賽嘛，最好有獎牌添。」Leon間接宣判了一審刑期。
我攤在座位上雙眼反白，原來低處未算低：「我而家行兩層上落課室都斷氣咁滯，點游呀，你問吓佢？」我指向阿心，企圖借她幫我解困。
她緩緩點頭：「我唔信佢係學生運動員囉。」我不禁暗讚女友抵錫。
「喂呀，暗幹（影子幹事）淨係得你有比賽經驗咋，你係冠軍級人馬，出山幫幫手啦，老友都唔幫？影響我終身事業㗎。」Leon出動接近十年的老年人情牌叫救命。
確實運動比賽嘅嘢，就算有「鬆姐」嘅財力，短時間都幫助不大。
我嘗試盡最後努力討價還價：「淨係游接力好嘛？或者我幫你訓練馬飛啦，佢多口水又唱K，實夠氣比賽。」
「唔好啦，你橫豎都要落場，順便扒多兩扒，游多場就得啦，幫幫手啦。」Leon來來去去就是不肯罷休。
眼見就快又繼續上堂，阿心都轉身坐好了，只好作出最後掙扎：「你畀我考慮吓先啦，學校有無著數畀我呀，會唔會可以奉旨走堂練水呀？你睇我，仲retake緊呀。」