《我老婆唔係我女朋友》【那些年／學界比賽／真人】 第四章至六章: 【第四章】 《男兒當入樽》下的運動熱潮（２）
「嗱，我今年做『聯體委』，呢啲公職經驗，對我將來出嚟做嘢好有幫助㗎，我梗係想人哋覺得我今年一做就有啲成績啦。而且啱啱完咗奧運，『聯體委』都想食住個勢，吸引返多啲同學留意校內體育發展。」Leon躊躇滿志的訴說著他的願景。
確實92巴塞奧運剛在幾個月前完結，市面上罕有地出現關注體育的小陽春，起碼暫時不是獨沽一味Slam dunk。
說來好笑，有哪一年政府不是在奧運後，像食了春藥一樣，異常亢奮的大聲疾呼，要大大力支持體育發展的。今年又嚟料喇，又睇吓粒春藥嘅效用幾時完啦。
我心諗咁多種聯校運動會，你搵條友染髮扮「櫻木花道」搞下事，或者叫人跑跑步咪好囉，再唔係叫馬飛裸跑都好有gimmick啦，反正個個日日都練氣，隨時準備走佬、走堂，你搞水運會替死咩。
我在心中再嘆一口氣，重覆問多一次：「噉到底你想點呢？」
「嗱，我想今年我哋最起碼參加一個個人項目同埋出一隊接力隊，最理想有人可以入決賽啦，有獎牌就perfect池。我同阿扁約定咗，佢會用我哋『【建橋】重返賽場』嚟做今年嘅文宣，畢竟我哋舊年無參加嘛，仲有半年時間，差不多要開始訓練喇。」Leon開始入正題了。
我鬆了口氣：「哦，想搵我幫手陪瞓咋，係咪？」嘿，講清楚啲，係培養個培，訓練個訓至真。
「唔係呀，頭先話得兩條友問，接力最少都四個人啦，計埋我落場都仲欠一個，我想你幫手落場呀。」Leon終於說出重點來。