交友app日記: Candy
我：「candy，快啲啦，再唔過嚟有排等啊。」
Candy:「得啦，再吵唔陪你玩過山車㗎。」
我：「係嘅大小姐。」
Candy：「起身返學啦」
我：「嚟到海洋公園點解要返學。」
Candy：「死仔包再唔起身我打死你。」
突然，係我前面排隊一拳打咗落我塊面到。
我成個人彈咗起身。 我：「屌，原來係發夢。阿媽，你做乜吵醒我啊，我個夢仲未發完啊。」
阿媽：「衰仔，你發咩夢咁重要啊，瞓住覺都係到笑。你自己睇下幾點，再唔起身就遲到啦。」
我睇下個鬧鐘，我：「屌，七點半啦，今次仆街。」
我用九秒九嘅速度刷完牙同換好衫就跑咗門口。
跑到最後直路，我見時間仲有五分鐘，見時間有啲鬆動。所以，我攞咗部手機出嚟回味下琴晚嘅對話。
突然，有個人拍咗下我膊頭話：「睇咩睇得咁入神啊，我叫咗你幾聲都唔認 ，有好嘢開心share喎。」
我嚇到即刻收返埋部電話。我：「阿軒你嚇死人咩，冇啦啦彈出嚟。」
阿軒：「我嗌咗你啦，係你唔應我啫。你部電話做乜收得咁快啊，係咪有啲咩唔見得光嘅嘢。」
我：「痴線啦你，咁八卦㗎你。」
阿軒：「你唔好同我講你一大朝就係到睇av喎。」
我：「我都冇你咁好氣。行快幾步，遲到啦。」
啱啱好係打鐘之入到學校門口，安全上壘。
今日成日我都冇留心上堂，成日都係到諗緊今朝個夢幾時先可以實現。最衰都係我老母，過山車都未玩就比佢吵醒咗。
好彩宜家返半日，好快就落口堂。一打鐘，我就即刻跑出去攞返我部手機同message佢。
阿軒：「阿諾，我今日唔洗留堂，一齊放啦。」
我：「咁你快啲執locker啦，趕時間啊。」
阿軒：「收皮啦，宜家你同我未一樣都係冇女，趕咩時間啊。你趕住返去睇av啊。」
我：「你當係啦，總之你快啲。」
阿軒：「好 搞掂。」
去地鐵站嘅途中，我哋同平時一樣係到9up。 我褲袋嘅手機突然震咗下，我即係攞出嚟睇下係咪candy覆我。
Candy:「我啱啱先放學睇唔到你訊息。」
佢終於搵返我，幾驚佢唔記得咗我。我：「唔緊要，我都係啱啱先放。」
Candy：「我見你今朝冇搵我以為你唔想傾添。」
阿軒：「係喎，今日派嘅數學卷你幾多分。」
我：「緊係唔係啦，我今朝遲咗起身所以先冇搵你啫。」我傾得太入神，冇理到阿軒講嘅嘢。
阿軒：「你同邊個傾計傾得咁開心啊，問你嘢又唔答。」
我：「同我老母傾計啫。」
阿軒：「同老母傾計會笑到咁，一睇就知同女傾啦，係咪識咗女朋友，快啲講。」
我：「邊到有女啊，咁易識到新女嘅話，你就唔洗單身17年啦。」
阿軒：「頂你啊 係要提係我啲傷心事嘅，拍過一次拖好叻咩。好 咁我啱啱問你咩。」
我：「你啱啱未問我聽日數學測邊課囉。」
阿軒：「on9 我問你數學幾分啊。」
我：「差唔多啫，78分啊。」
之後我為咗唔比阿軒發現我同女仔傾計，我都冇再覆candy。我落咗車之後就即刻覆返candy。