［少甜］同女神喺校長室扑嘢，點知畀我發現咗學校嘅秘密…: 第二章（下）

第二章（下）

一個禮拜之後，學校開學之後嘅第一個週會，有兩隊學生會候選內閣，上台宣讀政綱，爭取同學仔嘅支持。

第一隊叫做「伍為閣」，由藤英出名嘅擦鞋精周賀定做主席，帶領成班乖學生上台宣傳。

「嘩，使唔使呀？」孫家齊望住對手嘅團隊，好整齊咁一字排開，每個人都帶住同款嘅金絲眼鏡，校褲高過肚臍位置，黑色皮帶勒到件白色恤衫都就嚟變型，厚重嘅髮型柒到訓導主任都無法挑剔，孫忍唔住大笑出聲，「喂，除咗個頭盔先上台啦！」

台上嘅內閣無動於衷，但係台下有幾個老師聽到，都忍唔住睥咗孫一眼。





朱栢佳即刻對住幾位老師賠罪咁笑咗笑，然後轉身細聲兇孫家齊：「喂！玩少陣啦，班老師已經好唔妥你㗎喇，再咁落去唔使旨意佢哋會俾你做學生會呀。」

「唓～又唔係佢哋投票俾我嘅，怕佢有牙呀？」孫家齊不以為意。

「唔係呀大哥，就算係同學投票，都要啲老師俾你日圍先有得玩㗎，成個過程都係佢哋話事，話唔俾你做就唔俾你做㗎喇！」吳正苦口婆心嘅解釋俾孫知。

「嘩頂，咁咪姐係佢哋幕後控制所有嘢？投票嚟把撚呀？」孫家齊瞬間覺得晴天霹靂。

「冇辦法啦，你想阻止佢哋搞學校，就要跟佢哋個規矩玩，吳正！郁手啦！」朱栢佳同吳正對望咗一眼，然後一人一邊捉住孫家齊。





「喂！搞咩呀？」孫家齊想掙扎，又怕真係用力會傷到兩個兄弟。

「對唔字呀大哥，禾哋都係為你好㗎炸。」吳正真係好驚孫家齊嬲佢。

「一次咁多啦！想做學生會一定要扮乖仔㗎喇！你坐定定啦！」朱栢佳反而有啲幸災樂禍，孫家齊本來想大聲嗌唔好，後尾諗到頭先俾老師睥，最後都係老老實實，俾兩個兄弟「為所欲為」。

「⋯⋯所以，我哋『伍為閣』希望同尊敬嘅校長、老師同埋咁多位同學，組成一個強大團結嘅隊伍，為建設一個和諧、美好嘅校園一齊努力，懇請大家投出你哋手中神聖嘅一票，支持我哋嘅請坐底！多謝，多謝大家！」迪路擺出一副懇樣，用誇張嘅朗誦腔結束佢嘅講話，托咗托佢副金絲眼鏡，好似勝券在握咁。

「跟住落嚟，有請第二個學生會候選內閣『家的感閣』，主席孫家齊，上台宣讀政綱。」





台下嘅學生早已經聽聞孫家齊打算做學生會，當時仲以為係講笑，直到呢刻先發覺，佢哋心目中嘅大哥竟然真係突然咁踴躍參與學校嘅嘢，一時之間都唔識反應，而當孫家齊喺後台走出嚟嘅時候，所有人更加係O唒嘴，心諗：呢個係邊位？

孫家齊本來凌亂嘅短髮，俾朱栢佳梳到貼貼服服，吳正仲將自己嘅黑框眼鏡借咗俾孫戴，即刻令到孫銳氣大減，從來唔攝衫嘅孫家齊，將校服著到整整齊齊，仲要打埋呔，如果唔講，話佢係模範學生都有人信。

台下嘅同學望到眼都突埋，好似見到異形咁，孫家齊周身唔聚財，開口就想爆句粗先，但係眼尾睄到兩個兄弟瘋狂搖手，佢諗起自己參選嘅原因，於是強忍心裡面嘅怒火，用平生從未試過嘅正經語氣去講：「我係孫家齊，我要做學生會會長。」

台下倒抽咗一口涼氣。